SHUKRONA
Sharofiddin Boltaboyev she'ri
Yaratganim, o'zingga shukr,
G'amlar berib, suyganing uchun.
Yaratganim, o'zingga shukr,
Meni loyiq ko'rganing uchun.
Birda kelib – ketar omadni
Qadrin bil, deb barcha ne'matni.
Tashvishlari bisyor davlatni,
Kamlar berib suyganing uchun.
Yaratganim, o'zingga shukr
Mo'jizang ko'p, aytay qay birin,
Goho oshkor, goho yashirin,
Dunyo ahli termulgan zamin,
Buxoriylar berganing uchun.
Yassaviyu Islomda ustun
Termiziylar berganing uchun.
Ming bor qulluq, xolis ustozlar,
Berding shoir, hofizu sozlar,
Haqni yoz deb oppoq qog'ozlar
Qalam berib suyganing uchun.
Yaratganim, o'zingga shukr
Gunohlarim ildizim qirqib,
Toat qilsam o'zingdan qo'rqib,
Dard bersang-da ko'zimga surtib
Shukr, Tangrim, suyganing uchun.
Yaratganim, o'zingga shukr.
DEVONA OSHIQ
Muhammad Yusuf she'ri
Gulim, mehr ko`zda degani yolg`on,
Mening dilimda hech o`chmas yolqinsiz,
Qancha ko`rishmasak shuncha qadrdon,
Qancha olis bo`lsak, shuncha yaqinsiz.
Devona oshiqman, men bir devona,
Ayting sizdan bo`lak kimim bor yana?..
Siz yo`q chog`imdagi dunyom begona,
Siz yo`q bog`imdagi gullar yoqimsiz.
Siz achchiq qismatim, siz iztirobim,
Siz shirin dardimsiz, shurin azobim,
Siz mening ko`klardan topgan oftobim,
Yerlarda yo`qotgan ko`zmunchog`imsiz.
Yodimda kechagi sho`xliklaringiz,
Ko`ksimni kuydirgan kipriklaringiz,
Siz o`sha — Orzusi oydan oydin qiz,
Siz o`sha — kulgusi qo`ng`irog`imsiz.
Siz o`sha ko`zimning kiftida turgan,
Siz o`sha ko`nglimga ko`ngli in qurgan.
To`kilay deb tilim uchida turgan
She'rimsiz, bir umr bitmas ohimsiz...
BEVAFO
Ketar ekansan, shod kunlarimda
ketsang bo'lmasmidi?
Ko'ngling yo'q ekan, aytib ko'nglimdan
o'tsang bo'lmasmidi?
Tangrimdan bukun kelib boshimga
tushdi mushkul savdo
Shunday og'ir bir kunda yor bo'lib,
kutsang bo'lmasmidi?
Ey, bevafo endi qaytmagin
Tunlar to'lg'onib,
sensiz yashayman.
Sen unutganim, meni kutmagin.
Bag'rim o'rtanib,
sensiz yashayman.
Kun kelar Quyosh nuri ham
ado bo'lg'ay, ey jafokash,
Bu kir orzuga yuzimni bosmay
etsang bo'lmasmidi?
Kuyma fidoying bu bag'ri toshga
sira ham arzimas.
Shuncha mehringni bilganlarga
baxsh etsang bo'lmasmidi?
Ey, bevafo endi qaytmagin
Tunlar to'lg'onib,
sensiz yashayman.
Sen unutganim, meni kutmagin.
Bag'rim o'rtanib,
sensiz yashayman.